Fredag 25. oktober 1985 vart Stord lufthamn offisielt opna. Skulane fekk fri og fleire tusen personar møtte opp.
16 fly landa på den nye lufthamna denne dagen, mellom anna fly frå Widerøe, Partnair, Norving, Coast Aero Center og Fonnafly. Dessutan var Luftforsvaret innom med eit C-130 Herkules transportfly, som utførte ein «touch and go» på rullebanen. I tillegg stilte det fly frå flyklubbane Stord, Bergen og Stavanger.

Det vart halde fleire talar og flyplassen vart offisielt opna av fungerande kommunal og arbeidsminister Kjell Stahl.
Dagleg leiar ved lufthamna var Åsmund Myhre.

For 40 år sidan var det ingen brannstasjon eller terminalbygning på lufthamna. Men tårntbygget hadde eit lite venterom som vart nytta i samband med dei første flygingane. Seinare vart dette rommet nytta i samband med ankomst av fly, då det vart reist ein brakketerminal på andre sida av tårnet i 1987. Brakkene var i bruk fram til dagens terminalbygg stod klar i 2001.
Lufthamna sitt første venterom har sidan den gong fungert som tårnet sitt kjøkken. Sjølve tårnbygget er det same i dag som for 40 år sidan.

Meir enn ein million personar har reist over Stord lufthamn sidan opninga, og me vil takka kvar og ein som i 40 år har vald å nytta seg av snarvegen heim.

Foto/illustrasjon: Tor Resser / TAH